Кыргызстан Азербайжан менен энергетика тармагында кызматташат
Баку шаарында Кыргызстандын энергетика министри Таалайбек Ибраев Азербайжандын энергетика министри Парвиз Шахбазов менен жолугуп, энергетика тармагындагы эки тараптуу кызматташуунун келечектүү багыттарын талкуулашты.
Энергетика министрлигинин басма сөз кызматынын маалыматына ылайык, жолугушуу эл аралык энергетикалык иш-чаралардын алкагында өттү. Анда жашыл энергетиканы өнүктүрүү, энергетикалык коопсуздук жана аймактык кызматташтык маселелерине өзгөчө көңүл бурулду.
Билдирүүгө караганда, тараптар Каспий жашыл энергетикалык коридоруна Кыргызстандын катышуу мүмкүнчүлүктөрүн, ошондой эле Ысык-Көл облусунда азербайжандык инвестициялардын негизинде ишке ашырылып жаткан долбоорлорду электр энергиясы менен камсыздоо маселелерин карашты. Кыргыз тарап андагы объектти туруктуу жана үзгүлтүксүз электр энергиясы менен камсыз кылуу үчүн зарыл иштер жүргүзүлүп жатканын билдирди.
Мындан сырткары, тараптар мунай продуктуларын жеткирүү боюнча кызматташтыкты кеңейтүү маселесине токтолушту. Кыргыз тарап Азербайжандын мамлекеттик мунай компаниясы SOCAR менен кызматташтыктын оң натыйжаларын белгилеп, Кыргызстанга дизелдик отун жеткирүүнүн көлөмүн көбөйтүү мүмкүнчүлүгүн кароону сунуштады.
Жолугушуунун жыйынтыгында министрлер жашыл энергетика, энергетикалык инфраструктура, электр энергиясын өткөрүү жана мунай продуктуларын жеткирүү багыттарында кызматташууну мындан ары да тереңдетүүгө даяр экендиктерин билдиришти.
