Ысык-Көлдө көмөк чордондор жаңыланып, кубаттуулугу жогорулатылууда
Энергетика министрлиги жүргүзүп жаткан реформалардын алкагында “Кыргызстан улуттук электр тармагы”ААКнын филиалы – Ысык-Көл электр тармактары электр энергиясын ишенимдүү жана сапаттуу жеткирүү максатында аймактагы энергетикалык объектилерди модернизациялоо иштерин улантууда. Бул тууралуу аталган министрликтин басма сөз кызматы кабарлады.
Маалыматка ылайык, Каракол шаарындагы 110/35/10 кВ “Пржевальская”көмөк чордонунда кубаттуулукту жогорулатуу боюнча маанилүү иштер жүргүзүлдү. 2025-жылы көмөк чордондогу 25 МВА кубаттуулуктагы трансформаторлордун бири 40 МВА жаңы трансформаторго алмаштырылган болсо, быйыл дагы экинчи 25 МВА трансформатор 40 МВА кубаттуулуктагы заманбап жабдуу менен жаңыртылды.
Натыйжада “Пржевальская”көмөк чордонунун жалпы кубаттуулугу 65 МВАдан 80 МВАга чейин жогорулады. Бул жаңылоо электр тармактарындагы жүктөмдү азайтып, Каракол шаарынын жана Ак-Суу районундагы бир катар калктуу конуштардын тургундарын туруктуу жана сапаттуу электр энергиясы менен камсыздоого мүмкүнчүлүк түзөт.
Ошондой эле бекитилген планга ылайык, “Долинка” көмөк чордонун модернизациялоо иштери жүргүзүлүүдө. Долбоордун алкагында кубаттуулугу 10 жана 16 МВА болгон трансформаторлор эки даана 40 МВА жаңы трансформаторго алмаштырылып, жалпы кубаттуулугу 80 МВА болгон заманбап көмөк чордону түзүлөт.
Учурда долбоордун биринчи этабы аяктап, биринчи 40 МВА кубаттуулуктагы трансформатор ишке берилди. Экинчи этаптагы иштер июнь-июль айларында жүргүзүлөт. Бул иштердин натыйжасында Ысык-Көлдүн чыгыш жээгиндеги калктуу конуштарды жана туристтик объектилерди электр энергиясы менен камсыздоонун сапаты жана ишенимдүүлүгү кыйла жогорулайт.
