56 жылдан бери алмашылбаган электр чубалгылар жаңыланууда
Энергетика министрлиги энергетика тармагын өнүктүрүүгө багытталган реформаларды ишке ашырып, энергетикалык инфраструктураны жаңылоо жана электр менен камсыздоонун ишенимдүүлүгүн жогорулатуу боюнча бир катар долбоорлорду ишке ашырууда. Бул тууралуу аталган министрликтин басма сөз кызматы билдирди.
Маалыматка ылайык, бул иш-чаралардын алкагында жаңы кабелдик линияларды курууга жана учурдагы линияларды оңдоого өзгөчө көңүл бурулуп, борбор калаанын тургундарын сапаттуу жана туруктуу электр энергиясы менен камсыз кылууга шарт түзүлүүдө.
Долбоорлор электр энергиясына болгон тарифтик каражаттардын эсебинен каржыланып, эскирген энергетикалык объектилерди этап-этабы менен жаңылоого мүмкүндүк берүүдө.
Бүгүнкү күндө Бишкек шаарындагы кабелдик линиялардын жалпы узундугу 1150 чакырымдан ашат. Алардын айрымдары 1970-жылдары курулгандыктан, техникалык абалы жаңылоону талап кылат. Мурда кабелдердин орточо пайдалануу мөөнөтү 25 жылды түзсө, азыркы заманбап кабелдер 25 жылдан 40 жылга чейин кызмат кылууга ылайыкталган.
Ушуга байланыштуу “КУЭТ” ААКнын филиалы – Бишкек электр тармактар ишканасы тарабынан борбор калаанын кабелдик тармактарын оңдоо боюнча масштабдуу иштер жүргүзүлүүдө.
Белгилей кетсек, 2025-жылы кабелдик линиялар кызматы менен Курулуш-монтаждоо иштер кызматынын биргелешкен аракети менен 50 чакырымдан ашык кабелдик линиялар курулуп жана оңдолгон. Аткарылган иштер керектөөчүлөрдү электр энергиясы менен камсыздоонун ишенимдүүлүгүн жогорулатууга, техникалык жоготууларды азайтууга жана жаңы абоненттерди кошууга мүмкүнчүлүк түздү.
