Ысык-Көлдө 175 МВт кубаттуулуктагы күн электр станциясы ачылды
14-июнда мамлекет башчысы Садыр Жапаров Ысык-Көл облусуна болгон иш сапарынын алкагында Кызыл-Өрүк айылында кубаттуулугу 175 мегаватт-пик (МВтп) болгон “ROX Ысык-Көл” күн электр станциясынын биринчи фазасын ишке киргизүү аземине катышты.
Президент жаңы күн электр станциясынын расмий ачылышында сөз сүйлөп, энергиянын кайра жаралуучу булактарын өнүктүрүү Кыргызстан үчүн стратегиялык багыт экенин белгиледи. Анын айтымында, энергетикалык коопсуздукту камсыздоо жана климаттын өзгөрүшүнө каршы күрөшүү бүгүнкү күндүн башкы милдеттеринин бири болуп саналат.
Мамлекет башчысы максималдуу кубаттуулугу 175 МВт болгон күн электр станциясынын биринчи этабы ишке киргенин белгилеп, бул долбоор Кыргызстан менен Вьетнамдын ортосундагы ийгиликтүү инвестициялык кызматташтыктын үлгүсү экенин айтты. Долбоорду эл аралык тажрыйбасы бар вьетнамдык компания ишке ашырууда.
«Бүгүнкү долбоор – Кыргыз Республикасы менен Вьетнам Республикасынын ортосундагы достук мамиленин, өз ара ишенимдин жана ийгиликтүү инвестициялык кызматташтыктын айкын мисалы!» — деп белгиледи Садыр Жапаров.
Мамлекет башчысы белгилегендей, күн электр станциясынын жалпы кубаттуулугу 1900 МВт болуп, бардык баскычтарын ишке ашырууга дээрлик 1,5 миллиард АКШ доллары инвестиция тартылат. Ал эми бүгүн ишке кирген 175 МВттык биринчи этаптын инвестициялык көлөмү 131 миллион долларды түзөт. Курулуш иштерине 250дөн ашуун кыргызстандык тартылып, объект толук ишке берилген соң 150гө жакын туруктуу жумуш орду түзүлөт.
Президент станция өлкөнүн бирдиктүү энергетикалык тутумуна кошулуп, буга чейин эле 28,7 миллион кВт саат электр энергиясын бергенин билдирди. Биринчи этап толук кубаттуулукта иштегенде жылына болжол менен 295 миллион кВт саат электр энергиясы өндүрүлөт. Өндүрүлгөн электр энергиясы негизинен Чолпон-Ата жана Балыкчы шаарларын камсыздоого багытталат.
Сөзүнүн соңунда мамлекет башчысы долбоордун энергетикалык коопсуздукту чыңдоого, гидроэнергетикага болгон көз карандылыкты азайтууга жана жашыл энергетиканы өнүктүрүүгө чоң салым кошорун белгиледи.
