Бишкекте энергетиктерге заманбап техникалар тапшырылды
Энергетика тармагын заманга ылайык жаңылоо жана электр тармактарынын материалдык-техникалык базасын чыңдоо максатында Бишкек электр тармактар ишканасынын автопаркы жаңы техникалар менен толукталды.
Энергетика министрлигинин маалыматына ылайык, «Кыргызстандын Улуттук электр тармагы» ААКнын филиалы болгон Бишкек электр тармактар ишканасына атайын техникалар берилди.
Жаңы техникалар ишкананын өндүрүштүк бөлүмдөрүнө бөлүштүрүлдү. Атап айтканда, ISUZU NPR 75L-RK үлгүсүндөгү унаалар Чыгыш жана Батыш райондук электр тармактарына, Көмөк чордон кызматына жана Аламүдүн райондук электр тармагына тапшырылды. Ал эми FAW TIGER үлгүсүндөгү 25 метрлик автовышка Чыгыш райондук электр тармагына берилсе, SHANMON 388 экскаватор-жүктөгүчү Кабелдик линиялар кызматынын карамагына өткөрүлдү.
Калган техникалар эксплуатациялык, оңдоо жана авариялык-калыбына келтирүү иштерин аткарган өндүрүштүк кызматтарга бөлүштүрүлгөн.
Министрликтин маалыматына караганда, жаңы техникалар авариялык кырдаалдарга ыкчам чара көрүүгө, электр тармактарын тейлөөнүн сапатын жакшыртууга жана Бишкек шаарынын тургундарын жарык менен үзгүлтүксүз камсыздоого көмөк көрсөтөт.
Белгиленгендей, заманбап техникалык жабдуулар энергетика тармагынын натыйжалуу иштешин камсыз кылууда жана электр тармактарын өнүктүрүүдө маанилүү роль ойнойт.
