“Куланак” ГЭСинде суу жеткирүүчү канал курулууда
17-июнда Министрлер Кабинетинин Төрагасынын орун басары Эрлист Акунбеков Нарын облусуна болгон иш сапарынын алкагында “Куланак” ГЭСинин курулуш иштеринин жүрүшү менен таанышып, жооптуу тараптарга курулуш иштерин белгиленген мөөнөттө жана сапаттуу бүткөрүүнү камсыздоо боюнча тапшырмаларды берди.
Президенттик админстрациянын маалыматтык саясаты бөлүмүнөн кабарлагандай, учурда “Куланак” ГЭСинде дамбанын, ГЭС имаратынын жана узундугу 6,5 чакырымды түзгөн суу жеткирүүчү каналдын курулушу боюнча иштер активдүү жүргүзүлүүдө.
“Куланак” ГЭСи Нарын районунда “Нарын” өндүрүштүк ишканасы тарабынан ишке ашырылып жаткан ири энергетикалык долбоор болуп саналат. Долбоордун кубаттуулугу 100 МВтты түзүп, жылына 435 млн кВт/саат электр энергиясын өндүрүүгө мүмкүнчүлүк берет.
Белгилей кетсек, ГЭСти 2027-жылы пайдаланууга берүү пландалууда. Долбоор толук ишке киргенден кийин өлкөдөгү электр энергиясынын тартыштыгын кыскартууга салым кошуп, жаңы 2000ге жакын жумуш орундарын түзүүгө шарт түзөт.
