Баткенде селдин кесепетинен электр энергиясы үзгүлтүккө учурады
22-июнда нөшөрлөп жааган жамгырдын кесепетинен Баткен шаарынын аймагында жана Баткен районунун Самаркандек, Ак-Татыр, Суу-Башы жана Алтын-Бешик айыл аймактарында, Кадамжай районунун Орозбеков айыл аймагында сел жүрдү. Селдин кесепетинен Баткен облусунун айрым аймактарында электр энергиясы үзгүлтүккө учурады. Бул тууралу Баткен электр тармактар ишканасынан билдиришти.
Орозбеков айыл аймагы жана Шахимардан жогорку чыңалуудагы 35 кВ “Айдаркен-1” жана “Аайдаркен-2” аба чубалгыларынын үстүнө терек кулап, убактылуу электр энергиясыз калган. Баткен электр тармактар ишканасынын кызматкерлери тарабынан авариялык-калыбына келтирүү иштери ыкчам жүргүзүлүп, жаралган мүчүлүштүк жоюлду. Натыйжада Орозбеков айыл аймагы менен Шахимарданга электр энергиясы толугу менен калыбына келтирилди.
Суубашы айыл аймагынын Бөжөй айылында сел сууларынын кесепетинен 6 кВ аба чубалгысындагы 6 даана электр мамычасы агып кеткен. Учурда адистер жеринде иш алып барып, бузулган электр тармактарын калыбына келтирүү иштерин жүргүзүүдө.
Баткен электр тармактар ишканасынын кызматкерлери өзгөчө кырдаалдын кесепеттерин жоюу жана керектөөчүлөрдү электр энергиясы менен камсыздоону калыбына келтирүү үчүн күчөтүлгөн тартипте иш алып барууда.
