Электр энергиясын керектөө рекорддук көрсөткүчкө жетти
Аптаптуу ысыктан улам 19-июлда өлкө боюнча 50 млн 122 миң кВт/саат электр энергиясы керектелген. Былтыр ушул күнү бул көрсөткүч 42 миллион 514 миң кВт/саат эле. Жыл ичинде керектөө 7 млн 608 миң кВт/саатка же 18%ге өстү. Бул тууралуу “Улуттук электр тармагы” ишканасынан билдиришти.
"Буга кондиционерлердин жана башка климаттык жабдуулардын массалык түрдө колдонулушу себеп. Абанын температурасы 45 градуска жеткенде электр зымдардын өткөрүү мүмкүнчүлүгү 25%ге чейин төмөндөп, жабдууларга күч келүүдө. Авария жана жабдуулардын иштен чыгышын алдын алуу үчүн Бишкек менен Чүйдүн айрым аймактарында электр энергиясы эки сааттай өчүрүлүшү мүмкүн”, -дейт "Улуттук электр тармагы" ишканасынан.
Энергетиктер күндүз электр энергиясына суроо-талап эң жогору болгон маалда аны мүмкүн болушунча үнөмдөөгө чакырышат.
