Күйүүчү майга байланышкан инвестициялык долбоорду ишке ашыруу талкууланды
Министрлер Кабинетинин Төрагасынын орун басары – Суу ресурстары, айыл чарба жана кайра иштетүү өнөр жайы министри Эрлист Акунбеков бүгүн "Борбор Азия энергетикасы" жоопкерчилиги чектелген коомунун өкүлдөрү менен бензин жана дизелге байланышкан инвестициялык долбоорду ишке ашыруу маселесин талкуулады.
Отурумда жакында эле кол коюлган Министрлер Кабинети менен "Борбор Азия энергетикасы" ЖЧКсынын ортосундагы инвестициялык макулдашуунун долбоорунун ишке ашырылышы каралды.
Макулдашууга ылайык, Жалал-Абад облусунун Кочкор-Ата шаарында К-5 жана К-6 экологиялык стандарттарына жооп берген бензин, дизель, битум, мотор майын өндүрүүчү жана колдонулган майды кайра иштетүүчү мунайды кайра иштетүүчү заводду куруу жана эксплуатациялоо боюнча инвестициялык долбоор ишке ашырылат.
Заводдун долбоордук кубаттуулугу жылына 450 миң тонна мунай продуктуларын чыгарууну түзөт жана 300гө жакын жаңы жумуш орундары түзүлөт. Заводду куруу жана ишке киргизүү иштеринин биринчи этабын үстүбүздөгү жылдын күз айларына карата аяктоо пландалууда.
Жыйында завод үчүн өлкөгө импорттоло турган технологиялык жабдууларды алып келүү, бензин жана дизель отуну үчүн улуттук экологиялык стандартты иштеп чыгуу жана бекитүү, ошондой эле долбоорду ишке ашыруудагы курулуштун сапаты менен мөөнөтү сыяктуу маселелер талкууланып, тиешелүү мамлекеттик органдарга тапшырмалар берилди.
Эрлист Акунбеков - Министрлер Кабинети мамлекетке инвестиция салууга кызыкдар ишкерлер менен кызматташууга дайым даяр экенин белгилеп, ошол эле учурда бардык өндүрүш процесстери КРнын тийиштүү мыйзамдарынын талаптарына жооп берүүсүн, эл аралык стандарттарды сактоонун жогорку деңгээлин камсыз кылуу керектигин айтты.
