Көмүрдүн баасы кымбаттайбы?
Акыркы кездерде Кыргызстанда көмүр өндүрүү көбөйүп, кирешеси артып жаткандыгы айтылып келет. “Кыргызкөмүр” ишканасы өз күчү менен сапаттуу көмүр казып, элди кышында жеткиликтүү камсыздайбыз деп убада беришүүдө. "Ишкер" медиа сайты “Кыргызкөмүр” ишканасынын жетекчиси Рустамбек Садыралиевди кепке тартты.
– “Кыргызкөмүр” ишканасында сиз кызматка келгенден тарта кандай өзгөрүүлөр болду?
– Азыркы тапта күз-кышка даярдык кызуу жүрүүдө. Көмүр өндүрүш үчүн 6 ай ичинде 5 млн 314 миң жер кыртышын тазалап рекорддук көрсөткүчкө жеттик. Дагы да аракетибизди көрө берсек, 1,5 млн тонна көмүр өндүрүү мүмкүнчүлүгүбүз бар.
– Ишкананын кирешеси канча?
– 2024-жылы таза киреше 333 млн сом болду. 2025-жылы 511 млн сомго жетти. Быйылкы 6 айдын жыйынтыгы чыгарыла элек. Азыркы учурда эсепчилер акчанын суммасын чыгарууда.
– “Кыргызкөмүр” ишкансы канча көмүр өндүрдү?
– Жылдын аягына чейин 700-800 миң тонна кара алтын өндүрөбүз. Кыргызстандын көмүргө талабы 3 млн 300 миң тоннаны түзөт.
– Кыргызстандын түндүк аймагын “Кара-Кече”, “Ак-Улак” көмүр кендери камсыздайт. Бишкек ЖЭБине 700 миң тонна көмүр керектелет. 200 миң тонна бюджеттик мекемелерге колдонулат. Чүй, Ысык-Көл, Нарын, Талас жана Бишкекке 2 млн тоннага жакын керек.
– Кыргызстандын кайсы аймактарында кара алтын өндүрүп жатасыздар?
– Нарындагы "Кара-Кече", "Ак-Улак", Жалал-Абадда "Маркай", "Тегене", "Тулек", Сүлүктүдө "Он бир талаа", Алайда "Кожокелең", "Загара", Баткенде "Урмизам", Ноокатта "Беш-Буркан" кендерибиз бар.
– “Кыргызкөмүр” ишканасынын кышка даярдыгы кандай?
– Министрлер Кабинети бизге тапшырма берген. Бишкек ЖЭБин 725 миң тонна көмүр менен камсыз кылуубуз керек. Ошондой эле жеке ишкерлер менен биргеликте аймактарда социалдык көмүр кампаларын ачууну көздөп жатабыз.
– Көмүрдүн баасы кандай болот эми?
– Бүгүнкү күндө Кара-Кечеде кара алтындын баасы 3 миң сом. Антимонополия кызматы орток бааны эсептеп, көмүрдүн баасын чыгарат. Былтыр кышында көмүрдүн тоннасы 6600 сомдү түзгөн. Быйыл кара майдын баасынын жогорулашына байланыштуу көмүрдүн баасы да кымбатташы мүмкүн.
