Электр энергиясына болгон керектөөнүн деңгээли төмөндөй баштады
Өткөн сутканын жыйынтыгы боюнча электр энергиясын керектөө 44,4 млн кВт•саатты түздү. Бул көрсөткүч мурунку күндөргө салыштырмалуу электр энергиясын керектөө деңгээлинин төмөндөгөнүн көрсөтөт.
Энергетика министрлигинин маалыматына караган, бүгүн КРнын энергетика тутуму штаттык режимде иштеп жатат. Электр тармактарында ашыкча жүктөмдөр жана технологиялык бузулуулар катталган жок.
Ал эми алдыдагы күз-кыш мезгилине даярдыктын алкагында электр тармактарынын объектилеринде пландуу оңдоо иштери улантылууда. Пландуу оңдоо иштеринин графиги менен керектөөчүлөр “Кыргызстан улуттук электр тармагы” ААКнын расмий сайты www.nesk.kg, ошондой эле “Мой свет” мобилдик тиркемеси аркылуу тааныша алышат.
Белгилей кетсек, өткөнкү жумада электр энегиясын керектөө 50 миллион кВт. сааттан ашып, өлкөдө бир нече саатка чейин жарык өчкөн.
Ушуга байланыштуу энергетиктер керектөөчүлөрдү, эң жогорку жүктөм болгон сааттарда, электр энергиясын сарамжалдуу пайдаланууга чакырышууда.
