Өлкө боюнча электр тармактарын жаңылоого заманбап зымдар колдонулат

Кыргызстандын энергетикалык инфратүзүмдү жаңылоо үчүн өлкөгө 0,4 кВ чыңалуудагы өзүн өзү көтөрүүчү изоляцияланган зымдар (СИП-2) алып келинди.

Энергетика министрлигинин маалыматына ылайык, иш-чара "Электр энергетика секторун модернизациялоо жана туруктуу өнүктүрүү" долбоорунун алкагында ишке ашты.

Жалпы узундугу 100 миң метр болгон СИП-2 зымдарынын кесилиши 3×70+1×70 мм² түзөт. Жеткирүүнүн жалпы баасы 40,5 млн сомду түздү.

Министрликтин маалыматы боюнча, заманбап зымдарды колдонуу электр тармактарынын ишенимдүүлүгүн жогорулатып, керектөөчүлөрдү жарык менен туруктуу камсыздоого шарт түзөт.

Аталган долбоор Энергетика министрлиги тарабынан Дүйнөлүк банктын каржылык колдоосу менен ишке ашырылып, электр тармагын жаңылоого багытталган.