Үч-Коргон ГЭСинде төрт агрегаттын тең жабдуулары жаңыртылат

Үч-Коргон ГЭСинде станциянын негизги жабдууларын жаңыртуу жана белгиленген кубаттуулугун жогорулатуу максатында жүргүзүлүп жаткан жаңылоо иштери уланууда. Бул тууралуу Энергетика министрлигинин басма сөз кызматы билдирди.

Маалыматка ылайык, учурда №1 жана №2 гидроагрегаттарды жаңыртуу иштери жүрүп жатат. Аларды 2026-жылдын аягына чейин жаңылап бүтүшөт.

Бардык иштер аяктагандан кийин Үч-Коргон ГЭСинин белгиленген кубаттуулугу азыркы 198 МВттан 216 МВтка чейин көбөйөт. Башкача айтканда, станциянын кубаттуулугу 18 МВтка жогорулайт.

Станцияны калыбына келтирүү иштери 2024-жылы башталган. Долбоордун алкагында №4 гидроагрегат толугу менен жаңыртылып, анын кубаттуулугу 9 МВтка көбөйтүлгөн. Ошондой эле №3 гидроагрегат жаңыланып, анын кубаттуулугу дагы 9 МВтка жогорулатылган.

Белгиленгендей, №1 жана №2 гидроагрегаттардагы иштер аяктаган соң ГЭСтин төрт гидроагрегаты тең толугу менен жаңыртылат.

Маалым болгондой, Үч-Коргон ГЭСи Жалал-Абад облусунда, Нарын дарыясында жайгашкан. Станция 1961–1962-жылдары пайдаланууга берилген. 60 жылдан ашуун убакыттан бери иштеп келе жаткан ГЭСте жабдууларды жаңыртуу боюнча алгачкы ири иштер жасалууда.