Эгемендүүлүк күнүнө арналган иш-чараларда 200дөн ашуун энергетик нөөмөттө турду
Кыргызстандын Эгемендүүлүгүнүн 35 жылдыгына арналган Талас облусундагы майрамдык иш-чаралар электр энергиясы үзгүлтүксүз берилип, энергетикалык тутумда авариялык кырдаалдарга жол берилбестен өткөрүлдү. Бул тууралуу Энергетика министрлиги билдирди.
Маалыматка ылайык, майрамдык иш-чараларга даярдык көрүүдө электр энергиясын туруктуу жана ишенимдүү камсыз кылууга өзгөчө көңүл бурулган. Министрликтин жетекчилигинин тапшырмасы менен облустагы энергетикалык ишканалар алдын ала комплекстүү даярдык иштерин жүргүзүшкөн.
Адистер электр тармактарынын жана жабдуулардын техникалык абалын текшерип, резервдик электр булактарынын даярдыгын камсыз кылышкан. Ошондой эле зарыл учурда ыкчам чара көрүү үчүн нөөмөт бригадалары түзүлгөн.
Майрамдык иш-чаралар өтүп жаткан учурда 200дөн ашуун энергетик күчөтүлгөн жана күнү-түнү иштөө режиминде кызмат өтөшкөн. Алар электр тармактарынын жана жабдуулардын абалын үзгүлтүксүз көзөмөлдөп, күтүлбөгөн кырдаалдар жаралган учурда ыкчам чара көрүүгө даяр болушкан.
