Ат-Башы ГЭСинде күз-кыш мезгилине даярдык үчүн үч гидроагрегат оңдолду
Ат-Башы гидроэлектр станциясында 2026–2027-жылдардын күз-кыш мезгилине даярдык иштери жүрүп жатат. Учурда №1, №2 жана №3 гидроагрегаттарында кезектеги оңдоо иштери толугу менен аяктады.
Энергетика министрлиги билдиргендей, оңдоо иштеринин алкагында станциянын өндүрүштүк имараттарына капиталдык оңдоо жүргүзүлүп, Т-1 жана Т-2 трансформатордук аянтчалары тегизделип, шагыл төшөлдү. Ошондой эле 2×25 тонна жүк көтөрүмдүүлүгүндөгү көпүрөлүү кран 50 тонналык гидродинамометр менен сыноодон өткөрүлдү.
Мындан тышкары, автотранспорт каражаттарынын дизелдик жабдуулары оңдолуп, өрт коопсуздугуна өзгөчө көңүл бурулду. Станцияда автоматтык өрт сигнализациясынын долбоору иштелип чыгып, аны орнотуу иштери толугу менен аяктады.
Оңдоо графигине ылайык, сентябрь айында №4 гидроагрегатты жана №1 SFF-28000/115 үлгүсүндөгү трансформаторду кезектеги оңдоодон өткөрүү пландалууда. Даярдык иштери "Электр станциялары" ААКнын күз-кыш мезгилине карата оңдоо өнөктүгүнүн алкагында жүргүзүлүүдө.
