Дүйнөлүк банк Кыргызстанга ичүүчү суу менен жабдуу жана канализация системасын өнүктүрүүдө жардам берүүгө даяр
Дүйнөлүк банк Кыргызстанга ичүүчү суу менен камсыздоо жана канализация системасын өнүктүрүү боюнча долбоорлорунун жол картасын жана финансылык планын иштеп чыгууда колдоо көрсөтүүгө даяр. Бул тууралуу Дүйнөлүк банк тобунун Европа жана Борбордук Азия боюнча вице-президенти Антонелла Бассани Вашингтондо минкаб төрагасы Акылбек Жапаров менен жолугушууда билдирди.
Жолугушууда тараптар энергетика, адам ресурстары, ичүүчү суу менен камсыздоо жана канализация тармагындагы маселелерди талкуулашты. Минкаб башчысы белгилегендей, Кыргызстан бир катар тышкы жагдайларга карабастан, алгылыктуу экономикалык өсүштү сактай алды жана өнүгүү көйгөйлөрүн чечүүгө жөндөмдүү. Минкаб башчысы ошондой эле тышкы карызды жашыл жана климаттык демилгелердин аткарылышына алмаштырууну иштеп чыгууну сунуштады.
«Биз кызматташуунун жаңы деңгээлине өтүүгө даярбыз, ири долбоорлорду баштоого убакыт келди», — деди Жапаров.
Антонелла Бассани Дүйнөлүк банк ичүүчү суу менен жабдуу жана канализация системаларын өнүктүрүү боюнча долбоорлордун жол картасын жана каржылык планды иштеп чыгууда колдоо көрсөтүүгө даяр экенин билдирди. Ал ошондой эле Кыргызстанда өтө турган Суу форумуна катышууга чакырды.
