Үч облустагы ишкер айымдар жаш балдарга билим берүү жаатында бизнес баштоого 2.8 млн сом алышат
Ош, Нарын жана Жалал-Абад облустарындагы 11 ишкер аял балдарды эрте өнүктүрүү борборлорун ачууда 2.8 млн сом гранттык каржылоо алышат. Бул тууралуу АКШ элчилигинин басма сөз кызматы билдирди.
Бул каражат бала бакчалар менен билим берүү борборлору үчүн эмеректерди жана окуу куралдарын алууга багытталмакчы. Бул стартап-бизнестерди АКШнын Эл аралык өнүктүрүү агенттиги (USAID) жана Ага Хан Фонду колдоого алып жаткандыгы белгиленген.
Демилгенин алкагында 62 ишкер бала-бакча жана жаш балдарды окутуу борборлорун ачууга лицензия алуу жана ал бизнес мекемелерди башкаруу боюнча практикалык окуудан өтүшкөн. Үч айлык окуудан кийин катышуучулардын арасынан эң мыкты 11 бизнес-план гранттар менен сыйланган.
«Мен бала бакча ачайын дегем, бирок кантип ачарымды билбей жүргөм. Бул программага катышуу менин кыялымды ишке ашырууга мүмкүнчүлүк түздү”, — дейт Ноокат районунан келген катышуучу Айнура Савранбаева.
Программанын бүтүрүүчүлөрү бала бакчаларын жана билим борборлорун ачкандан кийин дагы колдоо ала беришет.
«Бул демилге кыргызстандыктардын жашоо сапатын жакшыртуу үчүн бир нече маанилүү багыттарды бириктирет. Балдардын билим алуу мүмкүнчүлүгү кеңейет. Жергиликтүү тургундар үчүн жумуш мүмкүнчүлүктөрү көбөйөт. Ал эми, ишкерлер билимге жана тиешелүү тажрыйба алышат”, — деп белгиледи USAIDдин Кыргызстандагы өкүлчүлүгүнүн башчысы Кайя Адамс.
Бул иш-чара USAID жана Ага Хан Фондунун биргелешкен «Жергиликтүү өзгөрүүлөр» долбоорунун бир бөлүгү болуп саналат. Долбоор жеке секторду жана жергиликтүү өнүгүүнү колдоо аркылуу инклюзивдик экономикалык өсүшкө салым кошот.
