Таксилердин лицензиясын текшерүү 2-февралдан башталат
Кыргызстанда такси кызматын көрсөткөн айдоочулардын лицензиясын текшерүү жана рейддер 2-февралдан тарта жүргүзүлө баштайт. Бул тууралуу ИИМдин Жол кыймылынын коопсуздугун камсыздоо башкы башкармалыгы (ЖКККББ) маалымдады.
Маалыматка ылайык, такси айдоочуларына лицензия алуу мөөнөтү 2026-жылдын 1-февралына чейин узартылган. Ошондуктан айдоочулар бул убакытка чейин тиешелүү уруксат кагазын алып үлгүрүшү керек.
ЖКККББ такси айдоочуларын лицензияны акыркы күндөргө калтырбай, азыртан алуу зарылдыгын эскертүүдө. Азыркы тапта лицензия берүү кызматы бардык аймактарда үзгүлтүксүз жана тез көрсөтүлүп жатат. Бирок мөөнөт аяктоого жакындаган сайын кезек көбөйүп, ыңгайсыздыктар жаралышы мүмкүн.
Белгилей кетсек, 2025-жылдын 22-августунан тарта такси кызматын көрсөткөн айдоочулар үчүн лицензия алуу милдеттүү болуп, оң рулдуу унаалар менен жүргүнчү ташууга тыюу салынган мыйзам күчүнө кирген.
Жаңы талапка ылайык, такси кызматында лицензиясы бар айдоочулар гана иштей алышат. Лицензиянын акысы жеке жактар үчүн жылына 500 сом, юридикалык жактар үчүн 1000 сомду түзөт.
Лицензиясы жок такси кызматын көрсөткөн жеке айдоочуларга 7 500 сом, юридикалык жактарга 23 миң сом айып салынат.
Лицензия кеминде үч жыл айдоочулук тажрыйбасы бар, жыл сайын медициналык текшерүүдөн жана техникалык кароодон өткөн, соттолбогон айдоочуларга берилет. Ошондой эле мыйзамга ылайык, оң рулдуу унаалар такси катары иштей албайт.
