Н. Орунтаев Токмоктогу архитектура башкармалыгынын курулушу менен таанышты
Күн мурун Курулуш, архитектура жана турак жай-коммуналдык чарба министри Нурдан Орунтаев Чүй облусунун Токмок шаарында шаар куруу жана архитектура башкармалыгы үчүн салынып жаткан жаңы административдик имараттын курулушу менен таанышты. Бул тууралуу ведомстводон билдиришти.
Министр курулуш иштеринин жүрүшүн көрүп чыгып, объектти белгиленген мөөнөттө сапаттуу бүтүрүү боюнча тиешелүү тапшырмаларды берди.
Долбоорго ылайык, имарат эки кабаттан туруп, кызматкерлер жана жарандар үчүн заманбап, ыңгайлуу шарттар түзүлөт. Буга чейин Токмок шаардык архитектура башкармалыгынын өзүнчө имараты болгон эмес.
Жаңы административдик имаратты 2026-жылы пайдаланууга берүү пландалууда. Учурда объекттин каркасы толук тургузулуп, курулуш иштери уланууда.
Курулушту “Кыргызкурулуш” мамлекеттик ишканасы жүргүзүүдө. Имарат мамлекеттик бюджеттен эмес, министрликтин ички ресурстарынын эсебинен курулуп жатат.
