Республикалык кан борборунун мурдагы директору коррупцияга шектелип кармалды
Республикалык кан борборунун мурдагы директору коррупцияга шектелип кармалды. Бул тууралуу Улуттук коопсуздук мамлекеттик комитети (УКМК) билдирди.
Маалыматка ылайык, аталган борборду 2012-жылдан 2025-жылдын август айына чейин жетектеп келген 54 жаштагы К.Б.Б. 2020-жылы жеке менчик компаниянын жетекчиси менен алдын ала сүйлөшүп алып, бюджеттик каражаттарды өзгөчө ири өлчөмдө чыгарып кетүүнү көздөгөн.
Тергөө маалыматтарына ылайык, алар Республикалык кан борборуна кымбат баалуу медициналык жабдууларды орнотушкан. Ошондой эле беш жыл бою лабораториялык реагенттерди жогорулатылган баада жеткирип турушкан. Ал эми түшкөн каражаттын белгилүү бир бөлүгү мурдагы директорго берилип турган.
УКМКнын маалыматы боюнча, жүргүзүлгөн тергөө иштеринин жүрүшүндө мамлекетке 36 млн сом өлчөмүндө зыян келтирилгени аныкталган.
Кылмыш ишинин алкагында Республикалык кан борборунун мурдагы директору УКМКнын тергөө абагына киргизилди. Ал эми жеке компаниянын жетекчисинин аракеттерине тергөөнүн жүрүшүндө укуктук баа берилери белгиленди.
Учурда бул иш боюнча коррупциялык схемага тиешеси бар башка кызмат адамдарын аныктоо максатында ыкчам-тергөө иш-чаралары улантылып жатат.
