Бишкекте 10 жылдан бери чечилбей келген турак үй маселеси жөнгө салынды

Курулуш, архитектура жана турак жай-коммуналдык чарба министрлиги тарабынан дагы бир көп кабаттуу турак үй мыйзамдаштырылды. Бул тууралуу ведомстводон билдиришти.

Министрликке караштуу Мамлекеттик архитектура-курулуш контролдоо департаментинин директорунун орун басары Руслан Суракматов жана Бишкек шаардык башкармалыгынын башчысы Мирлан Шайымкулов Ахунбаев көчөсү, 173 дарегинде жайгашкан 9 кабаттуу турак үйдүн жашоочулары менен жолугушуп, объекттин пайдаланууга берилгендиги тууралуу шайкештик акттысын тапшырды.

Белгилей кетсек, аталган турак үй 2014-жылы “Гарант Стиль Курулуш” ЖЧКсы тарабынан курулуп бүткөнүнө карабастан, ар кандай себептерден улам узак убакыт бою пайдаланууга берилбей келген. Мунун кесепетинен жашоочулар батирлерин өз атына каттай албай, тиешелүү документтерди алуу жана коммуналдык кызматтарды пайдаланууда кыйынчылыктарга туш болушкан.

Министрликтин өкүлдөрү турак жай расмий түрдө кабыл алынгандан кийин жашоочулар өз мүлкүн мыйзамдуу каттатып, коммуналдык кызматтарды кадимки тарифтер менен пайдаланууга мүмкүнчүлүк ала турганын белгилешти.