Нарындагы Кызыл-Жылдыз каналын реконструкциялоо иштери аяктады
Өлкө аймагында ирригациялык инфраструктураны жакшыртуу максатында суу каналдарын бетон полотнолору менен төшөө иштери активдүү жүргүзүлүүдө. Бул тууралуу Айыл чарба министрлигинен билдиришти.
Нарын облусундагы Кызыл-Жылдыз каналын реконструкциялоо долбоорунун алкагында каналдын ички бөлүгүнө бетон полотносун төшөө иштери толугу менен аяктады. Каналдын жалпы узундугу 2070 метрди түзүп, анын бардык бөлүгүнө бетон жабдыгы орнотулду.
Адистердин айтымында, жүргүзүлгөн иштер суунун жоготуусун азайтып, дыйкандарды сугат суу менен үзгүлтүксүз камсыздоого шарт түзөт. Буга чейин суунун бир бөлүгү жерге сиңип кетип, суу тартыштыгы жаралып келген болсо, эми мындай көйгөйлөрдүн алдын алуу мүмкүн болду.
Мындан тышкары, каналдын өткөрүмдүүлүгү жогорулап, сугат суу талааларга өз убагында жеткирилүүдө. Бул дыйкандардын эмгегин жеңилдетип, айыл чарба өсүмдүктөрүнүн түшүмдүүлүгүн арттырууга өбөлгө түзөрү белгиленди.
Суу ресурстарын сарамжалдуу пайдалануу жана ирригациялык системаларды модернизациялоо боюнча иштер мындан ары да улантылары маалымдалды.
