Кыргызстан элчиликтери үчүн АКШда 10 батир сатылып алынган
АКШда Кыргызстандын дипломатиялык өкүлчүлүгүнүн кызматкерлери үчүн 10 батир сатып алынганын тышкы иштер министри Жээнбек Кулубаев билдирди.
Анын айтымында, Нью-Йоркто 5 батир, Вашингтондо дагы 5 батир сатып алынган. Түштүк Кореядагы элчилик үчүн имарат мурда эле алынган, ошондой эле Австрияда имарат сатып алуу пландалып жатат. "Бардык процедуралар бүткөрүлдү. Бул ишти февраль–март айларында толук аяктоо пландалууда. Объекттердин баасы ар түрдүү. Мисалы, Австрияда имарат жакшы райондо жайгашканы үчүн 6–7 миллион долларга сатылып алынат", – деди ал.
Кулубаев кошумчалагандай, кыймылсыз мүлктү сатып алуу процедурасы татаал, андыктан мындай келишимдерди кыска мөөнөттө бүтүрүү ар дайым мүмкүн болбойт. "Женевада биз объектти сатып алуу үчүн экинчи жыл аракет жасап жатабыз — жергиликтүү өз алдынча башкаруу органдары уруксат бербеши мүмкүн", – деди министр.
Тышкы иштер министрлиги кошумчалагандай, 2026-жылы бул багыттагы иштер улантылат.
