"Айчүрөк" соода борборунун жанындагы курулуш бузула баштады
Бишкек мэриясы "Айчүрөк" соода борборунун (ЦУМ) имаратынын жанындагы металл конструкцияларды демонтаждоону баштады. Окуя болгон жерде шаардын мэри Айбек Джунушалиев өзү жүрөт.
Муниципалитеттин басма сөз кызматынын маалыматына ылайык, бекитилген долбоорго туура келбеген конструкцияларды жоюунун биринчи этабы бүгүн башталды.
Эске салсак, бул соода борборунун аймагындагы курулуш иштери бекитилген долбоордук чечимдерге ылайык келбейт деп табылган. Айбек Джунушалиев металл конструкцияларды демонтаждоону тапшырган.
Текшерүүнүн жүрүшүндө куруучу тарабынан ишке ашырылып жаткан объект макулдашылган эскиздик долбоорго туура келбегени жана шаар куруу кеңешинин жыйынында каралбаганы аныкталган. Курулуш иштери бекитилген параметрлерден четтөө менен жүргүзүлүп жатканы мурда айтылган.
ЦУМдун өкүлдөрү буга чейин коомчулук алдында мейкиндиктин архитектуралык концепциясы сакталары жана иштер бүткөндөн кийин фонтандар калыбына келтирилери тууралуу билдиришкен. Бирок фонтан ордунда жүргүзүлүп жаткан курулуш бул милдеттенмелердин аткарылышына күмөн жаратат. Фонтандык композицияны калыбына келтирүү аймакты талапка ылайык абалга келтирүүнүн милдеттүү шарты катары белгиленди.
Мэр куруучу тарапка конструкцияларды өз ыктыяры менен демонтаждоо үчүн үч күндүк мөөнөт берген.
