Президенттин иш башкармалыгы Түштүк пландоо аймагынан 50 гектар жер сурады
"Бишкек шаарындагы Токомбаев көчөсүндө (Түштүк пландоо аймагы) жайгашкан жер тилкесин мамлекеттик менчикке акысыз өткөрүп берүүгө макулдук берүү жөнүндө" токтом долбоору шаардык кеңештин кароосуна киргизилди.
Мэриянын маалыматы боюнча, Президенттин иш башкармалыгы 2026-жылдын 29-январындагы №11/236 кат менен кайрылып, аянты 50,4938 гектар болгон жер тилкесин мамлекеттик менчикке өткөрүп берүү мүмкүнчүлүгүн кароону суранган.
Бул аймакты мындан ары мамлекеттин кызыкчылыгында пайдалануу жана мамлекеттик программалар менен долбоорлорду ишке ашыруу үчүн берүү пландалууда.
Муниципалдык менчиктеги объектилерди мамлекетке акысыз өткөрүп берүү жергиликтүү кеңештин макулдугу менен жүргүзүлөт.
Буга чейин Президенттин иш башкармалыгы мэриядан төмөнкү даректердеги жер тилкелерин мамлекеттик менчикке өткөрүп берүүнү да суранганы кабарланган:
- Чүй проспекти, 108
- Киев көчөсү, 55
