Бишкекте көп жылдан бери көйгөйлүү болгон турак үй пайдаланууга берилди
Бишкек шаарынын Көк-Жар айылындагы Сейтек көчөсү 3 дарегинде жайгашкан 9 кабаттуу турак үй расмий түрдө пайдаланууга берилди. Бул тууралуу Курулуш министрлигинен билдиришти.
Курулуш, архитектура жана турак жай-коммуналдык чарба министринин орун басары Бакай Турдугулов жана Мамлекеттик архитектура-курулуш контролдоо департаментинин директору Марат Акназаров объектке пайдаланууга берүү актысын тапшырышты.
Маалыматка ылайык, турак үй “Аю Курулуш” ЖЧКсы тарабынан курулган. Бирок узак убакыт бою объектти пайдаланууга берүү маселеси чечилбей келген. Мунун негизги себеби катары долбоордон тышкары мыйзамсыз кошулган 10-кабат болгон.
Жолугушуунун жүрүшүндө Бакай Турдугулов 2025-жылдан бери мамлекет башчысынын тапшырмасы менен көйгөйлүү курулуш объекттерин этап-этабы менен жөнгө салуу иштери жүрүп жатканын белгиледи.
Белгилей кетсек, турак үй расмий кабыл алынбагандыктан, жашоочулар батирлерин өз атына каттай албай, документтерди алууда кыйынчылыктарга туш болуп келген. Ошондой эле коммуналдык кызматтар үчүн жогорулатылган тарифтер менен төлөп келишкен.
Жүргүзүлгөн иштердин натыйжасында объект мыйзамдаштырылып, тургундарга мүлкүн каттоого жана коммуналдык кызматтарды кадимки тариф менен пайдаланууга мүмкүнчүлүк түзүлдү.
