Жогорку Кеңеш шаар куруу, архитектура жана курулуш ишмердигинин негиздери тууралуу мыйзам долбоорун четке какты
Жогорку Кеңеш 2026-жылдын 29-апрелинде шаар куруу, архитектура жана курулуш ишмердигинин негиздери тууралуу мыйзам долбоорун четке какты. Парламенттин сайтындагы маалыматка ылайык, мыйзам долбоорунун демилгечилери мурунку чакырылыштагы 15 депутат болгон.
Демилгечи депутаттардын маалыматы боюнча, мыйзам долбоору 5 бөлүмдөн, 11 бөлүмчөдөн жана 58 беренеден турат:
I бөлүм — жалпы жоболорду камтыйт. Анда максаттар жана милдеттер, негизги принциптер жана түшүнүктөр, укуктук мамилелер, мамлекеттик саясат, мамлекеттик жана муниципалдык органдардын ыйгарым укуктары, жөнгө салуу механизмдери, субъекттердин укук-милдеттери жана башка маселелер аныкталат.
II бөлүм — шаар куруу ишмердигин маалыматтык камсыз кылуунун негиздерине арналган. Бул мамлекеттик шаар куруу кадастры аркылуу ишке ашырылып, тармакты санариптештирүүгө шарт түзөт. Ошондой эле бул бөлүмдө шаар куруу документтеринин статусу жана иерархиясы, Шаар куруу кеңешинин ишмердигин мыйзамдаштыруу, шаар куруу объекттери, көрктөндүрүү, инженердик-техникалык жана транспорттук инфраструктура, автордук укук жана көзөмөл маселелери каралган.
III бөлүм — шаар куруудагы трансформациялык процесстерди (реконструкция, модернизация, жаңылоо, реставрация) жөнгө салуучу нормаларды камтыйт. Бул турак жай жана инфраструктура фондунун эскиришин жоюу, жарандардын жашоо шарттарын жакшыртуу жана шаар аймактарын жаңылоого багытталган. Ошондой эле эски райондорду жаңылоо, көчүрүү жана бузуу учурунда тургундардын укуктарын коргоо, мамлекеттик-жеке өнөктөштүк (МЖӨ) аркылуу инвестиция тартуу каралган.
IV бөлүм — курулуш ишмердигинин негизги эрежелерин жөнгө салат. Анда башкы подрядчынын ролу, техникалык көзөмөл, курулуш объекттерин пайдаланууга кабыл алуу тартиби жана мөөнөттөрү, курулушту токтотуу, консервациялоо, демонтаж жана бузуу, авариялык кырдаалдардагы аракеттер жана чечим кабыл алуу мөөнөттөрү аныкталат.
V бөлүм — шаар куруу, архитектура жана курулуш тармагындагы субъекттердин жоопкерчилигин белгилөөгө, ошондой эле эл аралык кызматташтыкты жөнгө салууга багытталган. Бул бөлүмдө чет өлкөлүк адистер иштеп чыккан долбоорлорду жана курулуш технологияларын колдонуу маселелери да камтылган.
