Кыргызстанда ар башка унаанын тетиктеринен куралган Кытай техникалары аныкталды
Мамлекеттик бажы кызматы идентификациялык маалыматтары бурмаланган техниканы өлкөгө алып кирүүгө аракет жасалганын аныктады.
Маалыматка ылайык, Кытайдан Кыргызстанга "Торугарт" өткөрмө пункту аркылуу 2022-жылы чыгарылган деп көрсөтүлгөн алты Shachman үлгүсүндөгү жүк унаасы келген.
Текшерүүнүн жүрүшүндө унаалардын VIN-номурлары кол менен өзгөртүлгөнү, ал эми алардын чыныгы чыгарылган жылы 2017–2018-жылдар экени аныкталган.
Мындан тышкары, SHACMAN M3000 жана IVECO үлгүлөрү боюнча да мыйзам бузуулар табылган: оригиналдуу номерлер өчүрүлүп, ордуна жаңы VIN номерлер коюлган. Ошол эле учурда унаалар ар кайсы жылдары чыгарылган тетиктерден куралган.
Бардык материалдар тергөө органдарына өткөрүлүп берилди.
Бажы кызматы жарандарды жана ишкерлерди техника сатып алууда анын документтерин жана келип чыгышын кылдат текшерүүгө чакырат.
