Кыргызстанда күйүүчү-майлоочу материалдар рыногундагы абал туруктуу
Кыргызстанда күйүүчү-майлоочу материалдар (КММ) рыногундагы абал тышкы геосаясий факторлорго карабастан туруктуу бойдон калууда. Бул тууралуу 20-апрелде радионун эфиринде Экономика жана коммерция министрлигине караштуу Монополияга каршы жөнгө салуу кызматынын жөнгө салынуучу тармактар башкармалыгынын адиси Адеми Мурзабекова билдирди.
Анын айтымында, Жакынкы Чыгыштагы геосаясий кырдаалга байланыштуу монополияга каршы кызмат мамлекеттик органдарга бир катар сунуштарды иштеп чыккан.
Алардын катарына төмөнкүлөр кирет:
- нефть трейдерлерин субсидиялоо программасы;
- акциз салыгынан жана кошумча нарк салыгынан (КНС) толук бошотуу мүмкүнчүлүгү;
- күйүүчү майдын өздүк наркына таасир эткен маркировканы убактылуу алып салуу.
Мындан тышкары, республика аймагында кошумча нефть сактоочу жайларды куруу сунушталууда. Бул арзан баада сатып алынган мунай продуктыларынын запасын түзүүгө жана баалар туруксуз болгон учурда пайдаланууга мүмкүндүк берет.
Мурзабекованын айтымында, нефть трейдерлер менен өз ара аракеттенүү туруктуу негизде жүргүзүлөт: үзгүлтүксүз жолугушуулар жана жумушчу кеңешмелер өтүп, баалар, жеткирүүлөр жана күйүүчү майдын запастары боюнча маалымат алмашуу жүрөт.
"Бүгүнкү күндө Кыргызстанда КММ рыногунда абал туруктуу. Мунай продуктылары үзгүлтүксүз жеткирилүүдө. Нефть трейдерлердин маалыматына ылайык, запастар 1–1,5 айга жетет", — деди ал.
Анын айтымында, баа түзүү жөнүндө мыйзамдын алкагында монополияга каршы кызмат менен нефть трейдерлердин ортосунда кызматташуу тууралуу келишим түзүлгөн. Ага ылайык, компаниялар күйүүчү майдын баалык жана физикалык жеткиликтүүлүгүн камсыздоого, тышкы факторлорду эске алууга жана жетиштүү запастарды кармоого милдеттүү.
Ошондой эле кызмат күн сайын Бишкектеги май куюучу жайларда бааларга мониторинг жүргүзүп, Евразиялык экономикалык биримдикке мүчө өлкөлөрдөгү күйүүчү майдын баалары менен салыштырма талдоо жүргүзүп турат.
