Транспорт министрлиги Жол фондунун каражатынын 10%ын жол тармагына жумшоону сунуш кылды
Транспорт жана коммуникациялар министрлиги Жогорку Кеңешке "Жол фонду жөнүндө" мыйзамга өзгөртүүлөрдү киргизүү тууралуу мыйзам долбоорун киргизди
Мыйзам долбоорунун негизги максаты — Жол фондунун каражаттарын натыйжалуу пайдаланууну жогорулатуу, тармактын кадрдык потенциалын бекемдөө, жол чарбасын модернизациялоо жана автомобиль жолдорун каржылоонун туруктуулугун арттыруу.
Биринчиден, министрлик өзүнчө атайын эсеп түзүүнү сунуштоодо. Бул эсепке төмөнкү жыйымдар түшөт: атайын уруксаттар үчүн төлөмдөр, унааларды таразалоо үчүн жыйымдар, жолдорго келтирилген зыянды ордун толтуруу төлөмдөрү, ошондой эле жол тилкесиндеги жерлерди ижарага берүү акылары. Бул каражаттар кызматкерлерди материалдык жактан стимулдаштырууга, материалдык-техникалык базаны чыңдоого, көзөмөлдү санариптештирүүгө жана кызматкерлердин квалификациясын жогорулатууга багытталат.
Экинчиден, Жол фондунун каражаттарынын 10%га чейинкисин жол тармагын өнүктүрүүгө жумшоого уруксат берүү сунушталууда. Анын ичинде лабораторияларды модернизациялоо, жолдордун абалын санариптик мониторинг кылуу системасын киргизүү, жол уюмдарынын материалдык-техникалык базасын бекемдөө жана жол кызматтарына бекитилген жер тилкелерин эсепке алуу иштери бар.
Министрдин пикиринде, мыйзам кабыл алынса төмөнкү маселелер чечилет: кадрлардын тармактан кетишин токтотуу жана адистерди тартуу, айлык маянаны жогорулатуу аркылуу транспорттук көзөмөл пункттарындагы коррупциялык тобокелдиктерди азайтуу, жол инфраструктурасы үчүн мамлекеттик жерлерди сактоо, жолдорду көзөмөлдөөнүн заманбап технологияларын киргизүү, ошондой эле республикалык бюджетке кошумча жүк салбастан жолдордун сапатын жана узак мөөнөттүүлүгүн жогорулатуу.
2026-жылга Жол фондунун бюджети 7,95 млрд сом деп бекитилген. Ал эми 2025-жылдагы иш жүзүндөгү түшүүлөр 12 млн сомдон ашкан.
