Ички авиакаттамдар боюнча жеткиликтүү тарифтерди Asman Airlines сунуштайт

Бүгүнкү күндө ички авиакаттамдар боюнча эң актуалдуу жана жеткиликтүү тарифтерди мамлекеттик авиакомпания Asman Airlines сунуштап жатканын "Кыргызстан аэропорттору" ААКынын басма сөз кызматы билдирди.

2026-жылдын 1-майынан тартып Бишкек – Ош жана Бишкек – Манас (Жалал-Абад аэропорту) ички авиакаттамдарында авиабилеттерге макулдашылган баа системасы киргизилет. Бул чечим "Кыргызстан аэропорттору" ААК башкармалыгынын төрагасы Манасбек Самидиновдун ата мекендик авиакомпаниялар — Avia Traffic Company, Aero Nomad Airlines, Tez Jet жана Sky FRU менен болгон жумушчу жолугушуусунун жыйынтыгында кабыл алынган. Талкуунун жүрүшүндө тараптар өз ара түшүнүшүүгө келип, баа түзүүнүн бирдиктүү ыкмасын макулдашышты.

Бекитилген шарттарга ылайык, Бишкек – Ош багыты боюнча авиабилеттердин баасы эрте брондоодо 3 800 сомдон башталат, ал эми учууга жакын акыркы күндөрдө эң жогорку баа 5 900 сомдон ашпайт. Бишкек – Манас (Жалал-Абад аэропорту) багыты боюнча баштапкы баа 3 500 сомду, ал эми максималдуу баа 5 500 сомду түзөт.

Авиакомпаниялар белгиленген жогорку чектен ашпоо милдеттенмесин тастыкташты.

Мындан тышкары, мамлекеттик авиакомпания Asman Airlines дагы да жеткиликтүү баа саясатын карманат: Бишкек – Ош багыты боюнча билеттин эң жогорку баасы 5 500 сомду, ал эми Бишкек – Манас багыты боюнча 4 100 сомду түзөт.

"Ички авиакаттамдардын жеткиликтүүлүгү биз үчүн принципиалдуу мааниге ээ. Бекитилген тарифтерди киргизүү ички авиарынокту турукташтырууга, баалардын кескин өзгөрүшүн алдын алууга жана жүргүнчүлөр үчүн түшүнүктүү, ачык шарттарды камсыз кылууга мүмкүндүк берет", — деп белгиледи Манасбек Самидинов.