Кыргызстан-Кытай-Пакистан транспорттук маршруту ишке кирди
Эл аралык транспорт коридорлорун өнүктүрүү стратегиясын ишке ашыруунун жана дүйнөлүк деңиз портторуна түз чыгуу мүмкүнчүлүгүн камсыздоонун алкагында Кыргызстан—Кытай—Пакистан багыты боюнча жаңы пилоттук маршрут ишке киргизилерин Транспорт министрлигинин басма сөз кызматы билдирди.
Маршрут Бишкек шаарынан башталып, Торугарт, Кашгар, Хунджераб жана Исламабад аркылуу өтүп, Карачи деңиз портуна чейин жетет. Жалпы узундугу 3 300 чакырымды түзөт.
Бул багыт Кыргызстан үчүн стратегиялык мааниге ээ болуп, эл аралык транспорттук мүмкүнчүлүктөрдү кеңейтүүгө, тышкы соода жүгүртүүнү жандандырууга жана деңизге чыгуу жолдорун диверсификациялоого багытталган.
Долбоордун деталдары тууралуу ШКУга мүчө мамлекеттердин транспорт министрлеринин XIII жыйынында Пакистан Ислам Республикасынын Кыргызстандагы элчиси Альтамаш Вазир Хан маалымат берди.
"Өткөн жумада Кыргызстандан чыккан жүк ташуучу унаа Пакистанга ийгиликтүү жетти. Эки өлкөнүн тиешелүү министрликтери жолдун бардык этаптарында айдоочулар менен тыгыз байланышта болуп, тоскоолдуксуз жана ыкчам өтүшүн камсыз кылышты", — деп белгиледи элчи.
