Бишкекте балдар арабасы менен жүргөн ата-энелерге жол акысыз болушу мүмкүн
Бишкек мэри Айбек Джунушалиев балдар арабасы менен коомдук транспортту пайдаланган ата-энелерди жол акысынан бошотуу боюнча пилоттук долбоорду бир айлык мөөнөттө ишке киргизүү мүмкүнчүлүгүн кароону тапшырды. Бул тууралуу мэриядан билдиришти.
Мэр Айбек Джунушалиев "Бишкек шаардык транспорт" муниципалдык ишканасынын директору Талант Капаров менен кеңешме өткөрүп, коомдук транспорт тармагындагы бир катар маселелерди талкуулады.
Жыйындын жүрүшүндө калаа башчысы балдар арабасы менен коомдук транспортту пайдаланган ата-энелер үчүн жол акысын төлөөдөн бошотуу механизмин иштеп чыгууну тапшырды. Анын айтымында, тиешелүү жоболорго өзгөртүү киргизилгенге чейин демилге бир айлык пилоттук режимде сыноодон өткөрүлүшү керек. Андан соң жыйынтыгы талданып, зарыл болсо Бишкек шаардык кеңешине тиешелүү чечимдин долбоору сунушталат.
Ошондой эле кеңешмеде коомдук транспортто накталай эмес төлөм системасынын жыйынтыктары каралды. Учурда жүргүнчүлөр үчүн жол акысын төлөөнүн 11 ыкмасы жеткиликтүү. Маалыматка ылайык, 2026-жылдын 7-июлунда системада 735 миң транзакция катталган. Накталай эмес төлөмгө өтүүнүн натыйжасында шаардык бюджетке күн сайын орточо 1 млн сом кошумча түшүүдө.
Мындан тышкары, контролёрлор жол акысын төлөөнү текшерүү боюнча рейддерди үзгүлтүксүз өткөрүп жатканы белгиленди.
Кеңешмеде түнкү автобус каттамдары да сөз болду. Учурда аларда күнүнө орточо 2 134 транзакция катталып, шаар тургундары тарабынан оң бааланып жатканы айтылды.
Мындан сырткары, шаар мэри Батыш автобекетинде жана "Бишкекавтобекети" муниципалдык ишканасынын аймагында транспорттук карталарды сатуу мүмкүнчүлүгүн иштеп чыгууну тапшырды. Бул борбор калаага келген жарандардын жеке унаасын автобекетке калтырып, шаар ичинде коомдук транспорт менен жүрүүсүнө ыңгайлуу шарт түзүүгө багытталган.
Ошондой эле жайкы туристтик сезондо жүргүнчүлөрдүн суроо-талабын эске алуу менен Батыш автобекетинен №13 түнкү автобус каттамын уюштуруу демилгеси колдоо тапты.
