Бишкекте Киев–Раззаков көчөлөрүнүн кесилиши убактылуу жабылат
Бишкекте жылуулук тармагын реконструкциялоо иштеринин кийинки этабы башталып, Киев жана Раззаков көчөлөрүнүн кесилишинде унаа кыймылына убактылуу чектөө киргизилет.
Мэриянын маалыматына ылайык, Киев жана Панфилов көчөлөрүнүн кесилишинде жылуулук тармагын жаңылоо иштери ийгиликтүү аяктады. Анын алкагында диаметри 219 мм жана 273 мм болгон түтүктөр алмаштырылды.
Эми "Бишкекжылуулуктармагы" муниципалдык ишканасы реконструкциянын кийинки этабына өтөт. 8-июлдан тартып Киев жана Раззаков көчөлөрүнүн кесилишинде оңдоо иштери жүргүзүлүп, бул тилкеде автотранспорттун кыймылы убактылуу чектелет.
Бул жерде диаметри 426 мм болгон жылуулук түтүгү жаңыртылат. Ишкана белгилегендей, жүргүзүлүп жаткан иштер жылуулук тармактарынын ишенимдүүлүгүн арттырып, 2026–2027-жылдардагы күз-кыш мезгилинде жылуулук менен үзгүлтүксүз камсыздоого шарт түзөт.
Муниципалдык ишкана шаар тургундарын жана конокторун каттамдарын алдын ала пландап, убактылуу жол чектөөлөрүн эске алууга чакырды.
