Таласта 1 млрд сомдон ашык каражатка 28 чакырым жол курулууда

Талас шаарында жалпы узундугу 28 чакырымды түзгөн эки жана төрт тилкелүү жолдордун курулушу кызуу жүрүп жатат. Бул тууралуу Президенттин Талас облусундагы өкүлчүлүгүнөн билдиришти.

Маалыматка ылайык, учурда Бердике Баатыр, Атай Огонбаев, Оторбаев, Мырзалиев, Осмонкулов, Турдалиев, Шеркулов, Шамбетов, Манас, Үмөт Молдо, Мадиев жана Чубак Сатаев көчөлөрүндө жол куруу иштери активдүү жүргүзүлүүдө.

Бул масштабдуу долбоорлорду ишке ашырууга Президенттин турукташтыруу фондунан 1 миллиард сомдон ашык каражат бөлүнгөн.

Мындан тышкары, 2024-2025-жылдары Талас шаарында жалпы 30 чакырым жол жана 56 чакырым жөө адамдар үчүн тротуар курулган.