Мамлекеттик автомектептерге 70 жаңы автоунаа тапшырылды
КРнын Президентинин иш башкаруучусу Каныбек Туманбаев 6-ноябрда Сокулук районунун Ак-Жол айылында мамлекеттик автомектептерге 70 жаңы автоунаанын ачкычын тапшырды.
Маалыматка ылайык, автоунаалар "В" категориясы боюнча болочок айдоочулардын практикалык сабактарында колдонулат.
Каныбек Туманбаев автомектептердин материалдык-техникалык базасы чыңдалып, талаптарга жооп берген жаңы окуу имараттары жана автодромдор курулуп жатканын белгиледи.
Ош шаарында жаңы автодром ачылды, Бишкекте да жаңы автодром ачууга даярдык жүрүп жатат.
Автомектептерде окуу 10 айга созулат. Даярдыгы жетиштүү курсанттарга төрт айдан кийин экзамен тапшырууга мүмкүнчүлүк берилет.
Туманбаевдин айтымында, төрт айдан кийин эле экзамен тапшыргандардын жарымы ийгиликтүү тапшырып жатат.
Экзамендин жүрүшү башынан аягына чейин аудио жана видеого жазылып, жасалма интеллект системасы аркылуу да көзөмөлдөнөт.
Күндүн негизги жаңылыктары — Telegram каналыбызда
Каналга катталуу
