Банктарга эскилиги жетпеген чет элдик валютаны сыртка чыгарууга уруксат 2027-жылга чейин узартылды
Кыргызстандын коммерциялык банктарына эскилиги жетпеген нак чет өлкө валютасын өлкөдөн сыртка алып чыгууга берилген убактылуу уруксаттын мөөнөтү 2027-жылдын 1-апрелине чейин узартылды. Бул тууралуу Кыргыз Республикасынын Улуттук банктан маалымдашты.
Маалыматка ылайык, мурдагы токтомдогу “2026-жылдын 1-октябрына” деген мөөнөт “2027-жылдын 1-апрелине” деп өзгөртүлдү. Өзгөртүү токтомдун 1- жана 4-пункттарына киргизилди. Документ расмий жарыяланган күндөн тартып күчүнө кирет.
Улуттук банктын тиешелүү башкармалыктары токтом күчүнө киргенден кийин үч жумушчу күндүн ичинде аны КРдагы коммерциялык банктарга, чет өлкө валютасын сатууга жана сатып алууга укуктуу микрофинансылык жана микрокредиттик компанияларга, алмашуу бюролоруна жана тиешелүү мамлекеттик органдарга жеткирүүгө тийиш.
Бул жерде эскирбеген АКШ долларлары, башкача айтканда, физикалык абалы жакшы болгон банкноттор жөнүндө сөз болуп жатат. Эскирген купюралар жана эски үлгүдөгү долларлар үчүн өзүнчө тартип каралган.
Накталай долларларды өлкөдөн чыгарууда банктар терроризмди каржылоого жана кылмыштуу кирешелерди адалдоого каршы күрөшүү боюнча мыйзам талаптарын, анын ичинде эл аралык санкциялардын колдонулушу боюнча тобокелдиктерди эске алууга милдеттүү. Ар бир мындай операциядан кийин коммерциялык банк эки жумушчу күндүн ичинде Улуттук банкка отчет берүүгө тийиш.
Улуттук банк буга чейин накталай валютаны өлкөдөн чыгарууга байланыштуу ушундай механизмдерди киргизгенде, муну банктардын кассаларында топтолуп калган долларлык накталай каражаттардын запастарын башкаруу жана накталай эмес эсептешүүлөрдүн үзгүлтүксүз жүргүзүлүшүн камсыз кылуу зарылдыгы менен түшүндүргөн.
