Улуттук банкта ишкер аялдарды каржылоо боюнча Хартияга кол коюлду
Бүгүн Улуттук банкта ишкер аялдарды каржылоо кодексин ишке ашыруу боюнча Улуттук Хартияга кол коюлду. Документке Улуттук банк жана Кыргызстандын банктар союзу кол коюшту.
Аял ишкерлерди каржылоо кодекси (WE Finance Code) - аялдар жетектеген чакан жана орто бизнести каржылоону кеңейтүүгө багытталган эл аралык демилге. Кыргызстанда ал Улуттук банк, Европа реконструкциялоо жана өнүктүрүү банкы жана банктар союзунун биргелешкен аракети менен ишке ашырылууда.
Хартия Кодексти ишке ашыруунун негизги жолдорун, катышуучулардын өз ара аракетин жана маалымат чогултуу тартибин аныктайт.Учурда Кодекске 24 катышуучу кошулду: 12 банк, 10 микрофинансылык уюм, Кепилдик фонду жана Микрофинансы уюмдарынын ассоциациясы. Алар лидерлик, аракет жана маалымат деген үч багыт боюнча милдеттенме алышты.
Иш-чарага Экономика министрлиги, ЕРӨБ, Кепилдик фонд жана каржы секторунун өкүлдөрү катышып, аялдардын каржылоого жеткиликтүүлүгүн кеңейтүү маселелерин талкуулады.
Улуттук банк буга чейин "аялдар ишкердиги" түшүнүгүн мыйзамдарга киргизип, март айынан тарта гендердик маалыматтарды чогулта баштаган.
Хартияга ылайык, Улуттук банк - улуттук лидер жана маалымат агрегатору, Банктар союзу - улуттук координатор болот.
