Банктар капиталды баалоодо климат жана криптоактивдердин тобокелдиктерин да эске алат

КРнын Улуттук банкы коммерциялык банктардын капиталынын жетиштүүлүгүнө баа берүү боюнча ички жол-жоболорго өзгөртүүлөрдү киргизди. Тиешелүү өзгөртүү Улуттук банк Башкармасынын 2024-жылдын 27-декабрындагы токтому менен бекитилген жобого киргизилди.

Жаңы талаптарга ылайык, банктар тобокелдиктерди баалоодо күнүмдүк ишинде туш болгон тобокелдиктердин бардык түрүн эске алышы керек. Анын ичинде сандык баа берүү татаалыраак болгон абройго шек келтирүү жана комплаенс тобокелдиктери да камтылат.

Маалыматка караганда, банктар капиталдын жетиштүүлүгүнө келечектеги баа берүүдө өз стратегияларын ишке ашыруудан же операциялык чөйрөдөгү өзгөрүүлөрдөн келип чыгышы мүмкүн болгон тобокелдиктерди да эске алууга тийиш. Алардын катарына:

·       климаттын өзгөрүшүнө байланыштуу тобокелдиктер;
·       криптовалюталык активдерге байланыштуу тобокелдиктер;
·       банктын чет мамлекеттеги филиалынын ишине байланыштуу тобокелдиктер ж.б кирет.

Бул тобокелдиктер банктык тобокелдиктердин өзүнчө категориясы катары эмес, кредиттик, рыноктук, операциялык, өлкөлүк, комплаенс жана башка маанилүү тобокелдиктердин курамында аныкталып, бааланышы мүмкүн.

Тобокелдиктерди баалоо методологиясы банктардын ички ченемдик документтеринде аныкталат. Ошондой эле банктар башка олуттуу тобокелдиктерге дуушар болуу деңгээлин баалап, аларды жабуу үчүн капитал бөлүүгө тийиш. Мында чет мамлекетте иш алып барган банк филиалына байланыштуу тобокелдиктер да эске алынат.

Токтом расмий жарыяланган күндөн тартып 7 күн өткөндөн кийин күчүнө кирет.