Улуттук банктын төрагасы ЭВФтин брифингине катышты
Улуттук банктын төрагасы Алмаз Бакетаев 24-25-сентябрда Вашингтондо Эл аралык валюта фонду уюштурган жогорку деңгээлдеги брифингге катышты. Бул тууралуу мекеменин маалымат кызматы билдирди.
Маалыматка ылайык, брифингде борбордук банктын акча-кредит саясаты, финансы системасынын туруктуулугу жана институционалдык негизин бекемдөө маселелери талкууланды. Эл аралык резервдерди башкаруу, төлөм инфраструктурасын өнүктүрүү жана борбордук банктын санарип валютасына өзгөчө көңүл бурулду.
Иш-чаранын алкагында ЭВФтин башкаруучу директору Кристалина Георгиева менен жолугушуу өттү. Тараптар дүйнөлүк экономикадагы акыркы тенденцияларды талкуулап, Кыргызстан менен ЭВФтин кызматташтыгын улантуунун маанилүүлүгүн белгилешти.
