Кыргызстанда FinConference2026 өтөт: башкы тема — киберкоопсуздук
Кыргызстан банктарынын бирикмеси - FinConference2026 конференциясына өнөктөштөрдү жана активдүү катышуучуларды чакырууда. Билдирүүгө караганда, иш-чара 2026-жылдын 6-ноябрында Бишкектеги Hyatt Regency мейманканасында өтөт.
Конференциянын негизги темасы – “Киберкоопсуздук, антифрод жана жасалма интеллект: каржы секторун өзгөртүп жаткан технологиялар”.
Кыргызстан банктарынын бирикмесинин маалыматына караганда, иш-чарада санариптик инфраструктураны жана маалыматтарды коргоо, финансылык алдамчылыкка каршы заманбап технологиялар, ошондой эле коопсуздук, тобокелдиктерди башкаруу жана финансылык кызматтардагы жасалма интеллект жана AI/ML чечимдери талкууланышы күтүлөт.
Мындан тышкары, эл аралык тажрыйба жана алдыңкы технологиялык чечимдер кароого алынат.
Конференцияга банктардын жана каржы уюмдарынын жетекчилери, жөнгө салуучу органдардын, финтех жана IT компанияларынын, эл аралык уюмдардын өкүлдөрү жана эксперттер болуп 250дөн ашуун катышуучу келери пландалган.
Иш-чараны уюштуруучулар - компанияларды жана уюмдарды FinConference2026га өнөктөш жана активдүү катышуучу катары кошулууга чакырууда.
