Өкмөттө бюрократияны кыскартуу жана санариптештирүү чаралары талкууланды

Министрлер Кабинетинин Төрагасы Адылбек Касымалиевдин төрагалыгы алдында мамлекеттик системаны бюрократиядан арылтуу боюнча ведомстволор аралык комиссиянын сегизинчи жыйыны өттү. Бул тууралуу Өкмөттүн басма сөз кызматынан билдиришти.

Жыйында Президенттин 2025-жылдын 10-мартындагы №83 Жарлыгын ишке ашыруунун алкагында санариптештирүүнү тездетүү, административдик жол-жоболорду жөнөкөйлөтүү жана мамлекеттик кызмат көрсөтүүлөрдүн сапатын жогорулатуу маселелери талкууланды.

Финансы министри Алмаз Бакетаев санариптик долбоорлорду каржылоо жана Казыналык системасын кайра уюштуруу боюнча маалымат берди. Саламаттыкты сактоо министри Каныбек Досмамбетов тиешелүү жарлыктын аткарылышы тууралуу баяндама жасап, Министрлер Кабинетинин Төрагасы тарабынан бир катар тапшырмалар берилди.

Жогорку Соттун жана Башкы прокуратуранын өкүлдөрү сот системасын санариптештирүү, электрондук иш жүргүзүү жана IT-инфраструктураны жаңылоо боюнча иштер тууралуу маалымат беришти. Ошондой эле соттук отурумдарды түз эфирде көрсөтүү маселеси көзөмөлгө алынды.

Илим, жогорку билим берүү жана инновациялар министри Гүлзат Исаматова Улуттук илимдер академиясынын өз алдынчалыгын жогорулатуу боюнча иштердин жүрүшү тууралуу маалымат берип, нормативдик маселелерди тездетүү боюнча тапшырмалар берилди.

Жыйынтыгында ведомстволор аралык координацияны күчөтүү, тапшырмалардын аткарылышына мониторинг жүргүзүү жана санариптештирүү менен бюрократиядан арылтуу боюнча долбоорлорго ресурстук колдоону биринчи кезекте камсыз кылуу боюнча бир катар тапшырмалар коюлду.

Министрлер Кабинетинин Төрагасы бюрократияны жоюу мамлекеттик саясаттын артыкчылыктуу багыты бойдон кала берерин белгилеп, иштердин ыкчам жана натыйжалуу аткарылышын талап кылды.