Парламентте жаңы реформалык кадамдар жана санариптештирүү талкууланды
Жогорку Кеңештин төрагасы Марлен Маматалиев жакында эле президент Садыр Жапаров менен жолугушуп, парламенттин келерки 5 жылдык стратегиясын талкуулаганын билдирди. Төрага өз сөзүндө санариптештирүү жана реформаларга өзгөчө көңүл буруларын кошумчалады. Бул тууралуу Жогорку Кеңештин басма сөз кызматынан билдиришти.
“Президенттин администрациясында санариптештирүү саясатында чечимдер 10-20 эсе ыкчам кабыл алынат. Бул иштин натыйжалуулугун, каражат үнөмдөөнү жана адам ресурстарын туура пайдаланууну жакшыртат. Мисалы, 2024-жылы санариптештирүүнүн натыйжасында 1 млрд 205 млн сом үнөмдөлдү”, – деди Маматалиев.
Парламентте да документтерди электрондук түрдө берүү ишке ашырылат: ар бир депутатка планшет берилет, анда жыйындар, комитет отурумдары, депутаттык топтордун материалдары жана башка керектүү маалыматтар алдын ала жеткирилет. Ошондой эле маселе пайда болгон учурда тиешелүү жетекчилер онлайн катышууга мүмкүнчүлүк алат.
Мындан тышкары, Жогорку Кеңешке келгендер үчүн ыңгайлуу шарт түзүү максатында беш депутаттык топко өзүнчө коомдук кабылдама жана энелер бөлмөсү ачылары маалым болду.
