Улуттук илимдер академиясына 26 атайын кызматтык унаа тапшырылды
Министрлер Кабинетинин Төрагасынын орун басары Эдил Байсалов Улуттук илимдер академиясына (УИА) 26 бирдик атайын кызматтык автотранспорт каражатын тапшырды. Бул тууралуу Өкмөттүн басма сөз кызматынан билдиришти.
Маалыматка ылайык, унаалар УИАнын илимий мекемелеринин материалдык-техникалык базасын чыңдоо максатында сатып алынып, археологиялык, геологиялык, геофизикалык, биологиялык жана башка талаа илимий-экспедициялык изилдөөлөрдү жүргүзүүгө багытталат. Автотранспорт каражаттары 44 млн 800 миң сомгоалынган.
Тапшыруу аземинде Эдил Байсалов мамлекет тарабынан Улуттук илимдер академиясына туруктуу колдоо көрсөтүлүп жатканын белгилеп, имарат толук жаңыланганын, кызматкерлердин айлык маянасы эки эсеге жогорулаганын айтты. Анын айтымында, жаңы унаалар өлкөнүн алыскы жана жетүүгө кыйын аймактарында илимий изилдөөлөрдү жана экспедициялык иштерди жүргүзүүгө, ошондой эле мамлекеттик илимий жана илимий-техникалык тапшырмаларды аткарууга шарт түзөт.
Ошондой эле ал мамлекет илим тармагын өнүктүрүүгө мындан ары да өзгөчө көңүл бурарын белгилеп, стратегиялык милдеттерди ишке ашырууда илим чөйрөсүнөн инновациялык чечимдерди жана экономиканын өсүшүнө реалдуу салым күтүлөрүн билдирди.
Өз кезегинде Улуттук илимдер академиясынын президенти Канатбек Абдрахматов көрсөтүлүп жаткан колдоо үчүн мамлекеттин жетекчилигине ыраазычылык билдирди.
