Кыргызстан менен “Airbus Europe” авиация тармагында кызматташууну кеңейтет
Президент Садыр Жапаров 5-мартта “Airbus Europe” компаниясынын президенти Йохан Пелиссье жана “BBAM Leasing” компаниясынын улук вице-президенти Морис Прендергаст менен жолугушту.
Жолугушууда Кыргызстандын жарандык авиация тармагын өнүктүрүү, жаңы учактардын эсебинен авиациялык паркты кеңейтүү жана тармактагы кызматташтыкты чыңдоо маселелери талкууланды. Мамлекет башчысы “Airbus Europe” менен өз ара пайдалуу кызматташтыкты кеңейтүү Кыргызстан үчүн маанилүү экенин белгилеп, бүгүн кол коюлган келишим өлкөнүн авиациясын өнүктүрүүгө чоң салым кошорун айтты.
Президенттин айтымында, акыркы жылдары өлкөдө авиация тармагы активдүү өнүгүп жатат. Аэропорттордун инфраструктурасы жаңыланып, аймактык каттамдар кеңейүүдө. Буга чейин толук кандуу 4 аэропорт иштесе, учурда 11 аэропорт иштеп жатат, ал эми Жалал-Абад эл аралык аэропортунун курулушу уланууда.
Мындан тышкары, Кыргызстан Европа Биримдигинин авиациялык коопсуздук боюнча “кара тизмесинен” чыгуу процессинин акыркы баскычында турат. Акыркы аудит ушул айга пландалган.
“Airbus Europe” компаниясынын президенти Йохан Пелиссье Кыргызстандагы авиация тармагындагы оң өзгөрүүлөргө жогору баа берип, компания авиацияны модернизациялоо жана коопсуздукту жогорулатуу багытында кызматташууну кеңейтүүгө даяр экенин билдирди. Ал ошондой эле транспорт жана логистика тармагында да узак мөөнөттүү кызматташууга кызыкдар экенин айтты.
Ал эми “BBAM Leasing” компаниясынын улук вице-президенти Морис Прендергаст Кыргызстан сатып алып жаткан учактар эл аралык стандарттарга толук жооп берерин белгилеп, жаңы учактарды иштетүү боюнча адистер өлкөгө келип колдоо көрсөтөрүн билдирди.
Жолугушуунун соңунда тараптар мындан ары да өз ара пайдалуу жана натыйжалуу кызматташтыкты улантууга даяр экендиктерин белгилешти.
