Тигүү тармагы акырындап жандана баштады
Экономика жана коммерция министринин орун басары Беназир Нурланова Бишкектеги ири тигүү цехтердин бирине барып, өндүрүш процессин таанышып чыкканын министрликтин басма сөз кызматы билдирди.
Вице-министрдин айтымында, өлкөнүн тигүү жана текстиль тармагы 2025-жылдын күзүндө тышкы факторлордун таасири менен олуттуу кыйынчылыктарга дуушар болгон. Ошол эле учурда мамлекет бул секторду колдоо чараларын көрүп келет. 2026-жылдын январында Президент Садыр Жапаров тармактын өкүлдөрү менен жолугушуусунда көтөрүлгөн маселелер өзгөчө тартипте каралып, бул багыт президенттин жеке көзөмөлүнө алынган.
"Азыр оперативдик штаб иштеп жатат, ал бардык жаралган маселелерди тез арада чечүү механизмин камсыз кылат. Финансылык колдоо алкагында пайызсыз насыя берүү программасы ишке киргизилди. Салык жана административдик жеңилдиктер боюнча 2030-жылдын 1-январына чейин киреше салыгынын ставкасы 1% деңгээлинде бекитилди. Мындан тышкары, социалдык камсыздандыруу төлөмдөрү олуттуу азайтылды. Натыйжада ишкерлерге түшкөн жалпы жүк мурдагы 9500–9800 сомдон 2555 сомго чейин кыскарды. Ошондой эле 2026-жылдын аягына чейин салыктык жана ККМ контролунун рейддерине мораторий киргизилди", — деди Нурланова.
Экономика жана коммерция министрлигинин базасында өндүрүшчүлөр үчүн окутуу иш-чаралары уюштурулуп, экспорттун бардык этаптарында практикалык колдоо көрсөтүлүүдө. Вице-министр бул тигүү ишканасы мыйзам чегинде иштеп жатканын жана "көмүскөдө" иштебей турганын белгиледи.
"Ошондуктан продукцияны экспорттоодо ишкананын эч кандай тоскоолдуктары болгон жок. Ачык иштеген тигүү цехтери бүгүн туруктуу иштеп, жеңилдетилген насыяларды тоскоолдуксуз ала алууда", — деп түшүндүрдү ал.
Нурланова кошумчалагандай, мурда "кара схемада" иштеген ишканалар менен учурда консультациялар жүргүзүлүп, алардын мыйзамдаштырылышы үчүн комплекстүү иштер жүрүп жатат.
