2028-жылга чейин Кыргызстанда эски мектептер калбайт

Кыргызстандын президенти Садыр Жапаров 1960–1970-жылдары курулуп, авариялык абалда турган бардык мектептер 2028-жылдын сентябрына чейин толугу менен жаңыланарын же кайрадан куруларын Алай районунун тургундары менен жолугушууда айтты.

Президенттин басма сөз кызматы билдиргендей, өлкөдө болжол менен 3 миңге жакын айыл бар жана алардын көбүндө мектеп имараттары эскирген.

Мамлекет башчысынын айтымында, акыркы беш жыл ичинде мектептерди этап-этабы менен жаңылоо жана жаңы билим берүү мекемелерин куруу иштери жүрүп жатат.

Эске салсак, Ош облусуна болгон жумушчу сапарынын алкагында Садыр Жапаров он орто мектептин курулушуна капсула салуу аземине катышкан.