Президент Таш-Короо айылындагы жайытта кен казууну токтотууну буйруду
Алай районунун тургундары менен жолугушууда Садыр Жапаров айыл тургуну Дардак Алимканов жайыт жерлерин сактоо маселесин көтөрдү.
Анын айтымында, Таш-Короо айылында бир гана жайыт бар. Бирок "Нур Тейит" компаниясы ошол аймакта курулушта колдонулуучу сарыташты (травертинди) казууну пландап жатат.
“Нур Тейит” деген фирма бар, ушул жайытты казып, сарыташ алгысы келет. Компаниянын ээси ар дайым фирманын атын өзгөртүп жүрөт. Жергиликтүү элдин негизги тиричилиги айыл чарба болсо, биз кайда барабыз?" — деп кайрылды тургун президентке.
Жооп катары Садыр Жапаров район акимине жайыт жерлеринде пайдалуу кен казууга уруксат бербөөнү тапшырды.
Ош облусундагы президенттин ыйгарым укуктуу өкүлү Аманкан Кенжебаев билдиргендей, учурда аталган айылда эки лицензияны кайтарып алуу боюнча иштер жүрүп жатат.
