Бакудагы Алят портунда миңдеген жүк ташуучу унаалар топтолуп турат
Бакудагы Алят эл аралык портунда Борбор Азияга жүк тартып келаткан миңдеген фура жыла албай турганы эл аралык маалымат булактары жарыялады. Жакынкы Чыгышта согуштан улам Иран кошуна өлкөлөрү менен чек араларын жапкан. Ошол себептен Азербайжан-Түркмөнстан паром маршруту аймакка Түркия жана Европадан товар ташуунун жападан жалгыз жолу болуп калган.
Тажикстандык айрым ишкерлер менен айдоочулар Каспийден өтүүнү эки жумадан бери күтүп жатышканын айтыкан.
Алардын бири 15-апрелде "Озоди" радиосу менен маекте белгилегендей, бир эле маалда жүздөгөн оор машина деңизден өтүүнү каалайт, бирок паромдор анча фураны батыра албайт. Дагы бирөө учурда ал жерде 4 миңден көп фура топтолуп калганын айтат.
Мурда жүк ташыган машиналар Европадан жана Түркиядан кара жол менен келатканда Иран аркылуу өтүп, Түркмөнстанга кирчү. Алят портунан Түркмөнстандагы Түркмөнбаши портуна чейинки жол 12 саатты түзөт.
Айдоочулардын айтымында, алар негизинен жеңил машина, түрдүү жабдууларды жана кийим-кече алып келатышат.
АКШ менен Израил чабуулун баштаганда Иран өз чек араларын жапкан. 8-апрелде убактылуу жарашуу жарыяланганы менен чек аралар ачыла элек.
