Салык кызматы камсыздандыруу төгүмдөрүн кармоонун жогорку чегин киргизди
2026-жылдын 1-январынан тартып камсыздандыруу төгүмдөрүн эсептөө үчүн жогорку чек (бул эмгек акыдан Социалдык фондго төлөнүүчү социалдык төгүмдөр) киргизилгенин Мамлекеттик салык кызматынын басма сөз кызматы билдирди.
Бул нормага ылайык, бир кызматкер үчүн ай сайын иш берүүчү менен кызматкер чогуу төлөй турган сумма өткөн жылдагы өлкө боюнча орточо айлык акынын 20 эселенген өлчөмүнөн эсептелген суммадан ашпайт (бул көрсөткүч 720,9 миң сомго барабар).
"Эгер эмгек акы бул чектен төмөн болсо, төгүмдөр толук суммадан эсептелет, ал эми жогору болсо — белгиленген лимитке чейинки бөлүгүнөн гана алынат. Мында кайсы тариф колдонулганы жана камсыздандыруу төгүмдөрү кандай бөлүштүрүлгөнү мааниге ээ эмес", — деп түшүндүрүштү ведомстводо.
Камсыздандыруу төгүмдөрүнүн максималдуу суммасы төмөнкүдөй аныкталат: өткөн жылдагы орточо айлык акы 20га көбөйтүлүп, ошол сумма чектүү база катары алынат жана ошол базадан төгүмдөр эсептелет.
Көрсөткүчтөр:
- 2025-жыл үчүн орточо айлык акы — 36 047 сом;
- камсыздандыруу төгүмдөрүн кармоонун жогорку чеги — 720 940 сом (орточо айлыктын 20 эсеси).
Демек, 2026-жылы камсыздандыруу төгүмдөрүнүн чектүү суммасы төмөнкүлөрдү түзөт:
– 196 456,15 сом — 27,25% жалпы тариф колдонулганда;
– 88 315,15 сом — 12,25% тариф колдонулганда.
Эсептөө төмөнкү параметрлердин негизинде жүргүзүлгөн:
• өткөн жылдагы орточо айлык акы — 36 047 сом ;
• чектүү база — орточо айлык акынын 20 эселенген өлчөмү (720,9 миң сом);
• камсыздандыруу төгүмдөрүнүн тарифтери — 27,25% жана 12,25%.
